عه‌بدوڵڵا موعینی له‌ ڕۆژی چوارشه‌ممه (٢٤/١/١٣٢٢ هەتاوی) ١٤/٤/١٩٤٣ زایینی دا له‌ گه‌ڕه‌کی سه‌هۆڵخانه‌ی شاری مه‌هاباد پێی ناوه‌ته‌ سه‌ر جیهان. عه‌بدوڵڵا سه‌رده‌می منداڵیی خۆی له‌ باوه‌شی بنه‌ماڵه‌یه‌کی شۆڕشگێر و پڕ حه‌شیمه‌ت دا به‌سه‌ر بردووه‌. له‌ شاری مه‌هاباد، له‌ دوو فێرگه‌ی سه‌عاده‌ت و سه‌عدی دا ده‌وره‌ی سه‌ره‌تایی خوێندنی به‌ ئاخر گه‌یاندووه‌ و ده‌وره‌ی ناوه‌ندیشی له‌ خوێندنگه‌ی محه‌مه‌دره‌زاشا و په‌هله‌وی دا ته‌واو کردووه‌.
 
 عه‌بدوڵڵا هه‌ر له‌ سه‌ره‌تای گه‌نجی و لاوی دا سه‌رنجی داوه‌ته‌ سه‌ر خه‌باتی بێ وچانی سوله‌یمانی برا گه‌وره‌ی و له‌ ڕێکخراوه‌ی نهێنی دا چالاکی نواندووه‌. له‌ کۆ کردنه‌وه‌ی یارمه‌تی ماڵی و ناردنی بۆ شۆڕشی کوردستانی باشوور دا مۆره‌ و تاکێکی هه‌ڵسوڕاوی ماندونه‌ناس بووه‌.
 
 عه‌بدوڵڵا دوای وه‌رگرتنی دیپڵۆم، نه‌یتوانی درێژه‌ به‌ خوێندن بدات، چونکه‌ هێرشی کوتوپڕی ده‌زگای پۆلیس و ساواکی ئێرانی له‌ ساڵی ١٣٤٣ی هه‌تاوی، بۆ سه‌ر به‌ده‌نه‌ی ڕێکخراوه‌ی نهێنیی شاره‌کان و گیران و ده‌سبه‌سه‌ر بوونی ژماره‌یه‌کی به‌رچاوی گه‌نج و لاوی کورد له‌ شاره‌کانی سنه‌، سه‌قز، بۆکان، مه‌هاباد، شنۆ و نه‌غه‌ده‌ و گونده‌ کوردنشینه‌کانی ڕۆژهه‌ڵاتی کوردستان، عه‌بدوڵڵا به‌ ناچاری وڵات جێده‌هێڵێت و ده‌گه‌ڵ چه‌ندێک له‌ هاوڕێیانی ڕووده‌کاته‌ ئه‌ودیوی سنور و تێکه‌ڵ به‌ هێزی شۆڕشگێڕی کوردستانی باشوور ده‌بێت. له‌ چالاکی پێشمه‌رگایه‌تی و به‌تایبه‌ت له‌ ڕونکردنه‌وه‌ و به‌رزکردنه‌وه‌ی و‌ره‌ی شۆڕشگێرانه‌ی خه‌ڵکی زه‌حمه‌تکێشی گونده‌کانی ڕۆژهه‌ڵاتی کوردستان ، یه‌کده‌م ناسره‌وێت وخه باتي پيشمەر گايه تي و سياسي به دل و گيان ده باته پيش له ريگايه ش دا جاريك بريندار ده بيت . به‌ڵام به‌داخه‌وه‌ له‌ گه‌رمه‌ی هه‌نگاوی یه‌که‌م و له‌ سه‌ره‌تا و ده‌سپێکی پێشمه‌رگایه‌تی و سازکردنی شانه‌ی نهێنی له‌ نێو خه‌ڵکی ئاواییه‌کانی ڕۆژهه‌ڵاتی کوردستاندا هه‌واڵی شه‌هیدکردنی سوله‌یمان و چه‌ندێك له‌ هاوڕێیانی پێ ده‌گاته‌وه‌. شه‌هید بوونی سوله‌یمان و هاوڕێیانی نزیکی عه‌بدوڵڵا، ئه‌گه‌رچی زه‌ربه‌یه‌کی ده‌ردناک ده‌بێ، به‌ڵام عه‌بدوڵڵا و هاوسه‌نگه‌رانی خۆیان نادۆڕێنن و به‌ ڕوحێکی شۆڕشگێرانه‌وه‌ خۆ بۆ خه‌بات قایمتر ده‌که‌ن. به‌ڵام به‌ هۆی ساوا بوونی هێزی سیاسی و به‌تایبه‌ت ئاماده‌ نه‌بوون و له‌بار نه‌بوونی هه‌ل و مه‌رجی کۆمه‌ڵگای ئه‌و سه‌رده‌مه‌ و ، سه‌ربزێوی و خه‌یانه‌تی که‌سانێکی خۆ به‌ده‌سته‌وه‌ ده‌ر، له‌ جه‌وله‌یه‌کی پێشمه‌رگانه‌دا له‌ نزیک گوندی قالوێ له‌ مه‌ڵبه‌ندی گه‌ورکایه‌تی، ده‌که‌ونه‌ به‌ر هێرشێکی نابه‌رامبه‌ری هێزه‌کانی دوژمن و له‌ شه‌ڕێکی داسه‌پێندراو دا عه‌بدوڵڵا و مینه‌ شه‌م ڕۆژی پێنج شه‌ممه‌ (٣٠/٣/١٣٤٧ هەتاوی) ٢٠/٦/١٩٦٨ زایینی شه‌هیدده‌بن.



ته‌رمی عه‌بدوڵڵا و مینه‌ شه‌م دێته‌وه‌ ژاندارمه‌ریی مه‌هاباد، به‌ڵام ساواك ئاماده‌ نابێ ته‌رمه‌کان ڕاده‌ستی که‌س و کاریان بکاته‌وه‌. ده‌ڵێن فه‌رمانده‌ی ژانده‌رمه‌ریی ئه‌و سه‌رده‌مه‌ی مه‌هاباد (سه‌رهه‌نگ بابایی)گوتبووی که‌ ته‌نیا که‌سێك که‌ ده‌توانێ بۆ وه‌رگرتنه‌وه‌ی ته‌رمی شه‌هیده‌کان سه‌ردانی ساواك بکات و ئه‌م ئه‌رکه‌ ڕاپه‌ڕێنێت، شێخ محه‌مه‌د معسوم، باوه‌ڕپێکراوی حکومه‌ته‌ و به‌س. باوکی عه‌بدوڵڵا چه‌ند که‌سێک ده‌نێرێته‌ لا‌ی شێخ، به‌ڵام شێخ ناچێته‌ ژێر ئه‌و داواکارییه‌ و خۆی لێ نادا. ساواك و ژاندارمه‌ری ته‌رمی عه‌بدوڵڵا و مینه‌ شه‌م ده‌نێرنه‌ پادگانی پیرانشار و له‌ گۆڕستانێکی کۆنی ئه‌و شارۆچکه‌یه‌ دا به‌ خاکیان ده‌سپێرن.
 
  سه‌رچاوه‌ مەڵپەری بنەماڵەی موعینی