دار چنارا خالانه‌ له گۆندێ‌ هلۆرا



دار چنارا خالانه‌ له گۆندێ‌ هلۆرا دهێته‌ هژمارتن ئێك ژ مه‌زنترین داران ل كوردستانێ‌ كو ژیێ‌ وێ‌ بۆ به‌ری‌  ٣٠٠  سالان ڤه‌دگه‌ریت و فره‌هیا وێ‌ ٥.١٤ مه‌تره‌ و ٣٠ مه‌تران ژی‌ یا درێژه‌.

 مێژوویا ڤێ‌ دارێ‌ ڤه‌دگه‌ریته‌ ٣٠٠ سالان به‌ری‌ نها و ل بن دیوارێ‌ مزگه‌فتا هلۆرا شین بوویه‌ و هه‌تا نها ژی‌ هه‌ر یا شینه‌ و خه‌مله‌كا جوان یا هه‌ی‌ ل دووڤ گۆتنا وه‌لاتی‌ نه‌وزاد زاده‌ كو ئێك ژ وه‌لاتیێن ڤی‌ گۆندی‌ یه‌.

 ئه‌ڤی‌ وه‌لاتی‌ ئه‌و ژی‌ دیاركر كو تشتێ‌ سه‌یر د قه‌بارێ‌ ڤێ‌ دارێ‌ دایه‌ كو فره‌هیا وێ‌ دگه‌هیته‌ ٥.١٤م و بلنداهیا وێ‌ ژی‌ دگه‌هیته‌ 30م و گۆت: (بن قورمێ‌ ڤێ‌ دارێ‌ ئاڤه‌كا جوان و زه‌لال هه‌لدایه‌ و ئه‌ڤێ‌ ئاڤێ‌ بۆ نه‌هێلانا ره‌ملێ‌ و به‌ركی‌ و كلیا كاریگه‌ریا خۆ هه‌یه‌ و هاتیه‌ پشكنینكرن ژ لایێ‌ ١٢ دكتورێن سه‌ر ب پارێزگه‌ها دهۆكێ‌ و ئاڤا وێ‌ ب رێژا ٩٤% یا پاقژه‌، ئانكو پێدڤی‌ ئاڤا دلۆپاندی‌ نابن).

 زێده‌تر گۆت: (تشتێ‌ سه‌یرێ‌ ڤێ‌ ئاڤێ‌ ئه‌وه‌ كو ل زڤستانێ‌ زۆرا گه‌رمه‌ و مرۆڤ دشێت بێی‌ گه‌رم كرن سه‌رێ‌ خۆ پێ‌ ب شووت و هاڤینێ‌ ژی‌ بێی‌ ته‌زاندن ڤه‌خۆت).

 خۆیاكر كو ڤێ‌ كانیێ‌ سولاڤه‌كا گه‌له‌ك جوان دروستكریه‌ ب دووراتیا ١٠م ژ رووباری‌ و سالانه‌ هژماره‌كا زۆرا كه‌شتیاران ل هه‌موو كوردستانێ‌ سه‌ره‌دانا ڤی‌ جهێ‌ كه‌شتیاری‌ دكه‌ن و گۆت: (ئاریشه‌یا ڤی‌ جهێ‌ كه‌شتیاری‌ ئه‌وه‌ كو ترۆمبێل ناچیته‌ سه‌ر و پێدڤیه‌ وه‌لاتی‌ ئێك كیلومه‌تر ب پیان بچن تا بگه‌هنه‌ ڤی‌ جهی‌).

 ئه‌ڤ داره‌ یا ل گۆندێ‌ هلۆرا سه‌ر ب ناحیا دێره‌لوك ژ لایێ‌ ئیداری‌ ڤه‌ و سه‌ر ب ناحیا به‌رده‌ره‌ش ژ لایێ‌ جوگرافی‌ ڤه‌، نێزیكی‌ ده‌ڤه‌را بارزان و سه‌ر رووبارێ‌ زێ‌ یێ‌ بچووك.